Mizoram Pradesh Congress Committee (MPCC)

Zu Chungchanga MPCC President Pu Lal Thanhawla Thuchah

22/11/2018

PRESS STATEMENT

“Zu chungchanga nasa taka tawngtaitu Kohhrante hi
Zu zawrh chungchangah kan rawn zel dawn”

Kan hriat theuh angin kum 17 zet MLTP Act hnuaiah zu khap bur (Total Prohibition) a ni a. Heng hun chhung zawng hian Zu hi a hluar em em reng tho a, Zu chhia pawh a tamin zu chhe in avanga thi pawh an tam a ni. Mizoramin chakkhai kan lakna kawngpui ber (lifeline) Assam-a Lailapur leh Bhaga kawng dunga zu dawrte khu a dawrtu tam ber chu Mizote kan ni. Hetiang a nih avang hian kan kal dan hi ennawn a ngai niin mi tam takin an ngai a. Zu chhe in avanga mi tam tak an boral bakah Zu khapbur avangin Mizoram pawnah Mizote kan hming chhe ta zeuh zeuh a, lemchang nun kan uar phah tak bawk avangin Congress Sorkar chuan kum 2014 July 10 khan zu khuahkhirhna dan thar The Mizoram Liquor Prohibition and Control Bill, 2014 a pass ta a;hei hi kum 2015 March atanga hman tan niin,hman a nih phat atangin titi a siam tam hle a ni.

Thununna (Control) hnuaia Zu zawrh vanga titi a tamna chhan chu ‘Kohhran kan rawn dawn lo’ tih tawngkam hman a nih vang a ni a. Khatih hunlaia Excise Minister, Pu R.Lalzirliana chuan he tawngkam hi Tualbung khuaa a thusawinaah a sawi a, hei hian rang takin ram pum a fan chhuak nghal a ni. Mizoram Legislative Assembly House a MLPC Bill, 2014 an sawiho (July 10, 2018) tum khan he Bill puluttu, Pu R.Lalzirliana chuan, “…Kohhran tawngtainaah a tawpna ka siam nghe nghe a, chuta ka tawngtainaah chuan Pathian hnenah ‘he thil hi rem I tihloh chuan keima taksaah harsatna min siam rawh’ ka ti a. Pathian pawhin rem a ti a niang, hei MLPC Bill pu lut turin ka rawn kal thei a ni…” tiin a sawi nghe nghe.

Amaherawhchu, Kohhran mipuite zah avangin Zu zawrh chungchangah Congress Party-in ngaihdan felfai tak a neih theih nan MLPC Study Group leh MPCC OB & CLP te inrawn khawmna nei turin Excise Minister Pu R.Lalzirliana hnenah July 27, 2018 khan lehkha theh luh a ni a. Mahse, khatih hunlai atang tawh khan Pu. R.Lalzirliana hi party chhungah a hel ruk tlat avangin MLPC Study Group leh MPCC OB & Congress Legislature Party (CLP) te inkawmhona turin hmalakna a nei duh ta lo va. MNF Party-a a luh ni thleng khan MPCC OB-te lehkha thehluh hi a hup bo tlat a, Party chhungah a la awm ve si avangin Congress Party tan hmalak a har em em a ni.

Kohhran mite rawn duh lotu Excise Minister kan neih avang khan Congress party kha a chih a, Pu R.Lalzirliana thusawi khan Congress Party hruaitu leh mipuite rilru a tina em em a ni. Tunah chuan MNF Party-ah a awm ta bawk a, Congress Party chuan MLPC Act chungchangah hetiang hian ngaihdan a puang thei ta a ni:

Lal Thanhawla, MPCC President Message
“Zu hi a tha em a, zawrh tur a ni tih lam ni lovin khap bur a nih lai reng si a Zu zalen em em reng bawk si, Zu chhe in avanga thi awm reng chunga dan palzut a, a ruka zuar leh in an awm reng tih mitinin kan hria a. Khauh tak si,uluk taka zu tha zawrh chu enchhin nise tih avangin MLPC Act, 2014 hi kalpui a ni a.Kum 3 vel chauh MLPC Act hi hman a la ni a, kan la enthla mek a;a tha kan tih vanga zuar pawh kan ni lo, a tha lo ro ro zingah a tha deuh ber angin kan kalpui a ni mai a. Khuahkhirh (control) in, Kohhran kan zahloh vang ni loin; inthlahrung tak siin kan kalpui mek a ni. Assembly House-ah pawh enchhin phawt rawtin thu tlukna kan siam a nih kha. Amaherawhchu, he dan hi Mizoram tana dan tha lo a nih tak zet chuan Zu chungchanga nasa taka tawngtaitu Kohhrante hi Zu zawrh chungchangah kan rawn zel dawn tih kan puang a ni. Kohhran hi kan zah em em a, Mizo Kristian te’n Kohhran kan zahloh chuan zah tur dang kan nei lo tih hi kan dinna a ni a. Kan Excise Minister hlui, ‘Kohhran kan rawn dawn lo’ titu Pu R.Lalzirliana tawngkam avanga rilru na Kohhran mipuite hnenah ngaihdam kan dil a ni.”

PRESS STATEMENT

Congress Party chuan Oct. 1, 2007 a hun lo taka boral Rev. Chanchinmawia kha mahni inthatah kan la ngai thei lova. Rev. Chanchinmawia taksaah hliam nasa tak hmuh a ni a, a thih chhan tak hriat chian theih a ni lova; Police leh CBI ten theihtawp a an chhui hnu pawhin a thih chhan leh a thih dan hi hriatchian theih a ni lo. Heti chung hian Mizoram Synod ngaihdan tawmin Rev. Chanchinmawia hi mahni inthatah Congress Party chuan kan ngai thei lo va. Hetih rual hian inthlan hun hnai tawh taka a dinna bial Tawi a Press Conference meuh ko va Pu Lalzirliana’n a sawi chhuak leh hi a hun lo kan ti a, Rev. Chanchinmawia thihna chungchanga hamthatna lak tumnaah kan ngai a ni.

Tawi bial a MNF MLA Candidate Pu R. Lalzirliana chuan Rev. Chanchinmawia thih dan chungchang Congress Thlifim chanchinbu a chhuah a ni chu mak a tih thu chanchinbu mite hmaah a sawi a. Thlifim chanchinbu ah khan Presbyterian kohhranin Rev. Chanchinmawia kha mahni inthat a nih loh thu, Synod thuchhuah ngei MPF chanchin, tih lehkhabu a an chhuah ngei kha kan chhuah chhawng mai a, Pu R. Lalzirliana’n mak a tih leh tih loh tur lam, Thlifim enkawltute chuan kan ngaihtuah lo.

Thansanga’n he thu a sawi tirh khan amah Pu Zira ngei hian Media room-ah, Thansanga thusawi hi Thanglawra nen lo buaipui rawh u min ti a, a thu ang chuan Thansanga kan kova thu kan sawifiah ta vek a ni. Engah nge tunah MNF Party-a aluh tak avang a tul lo a tih leh tak tih hi Pu R. Lalzirliana kan zawt let a ni.

_________________________________________________________________________________________________
Issued by Mizoram Pradesh Congress Committee Media Department Dt. 22.11.2018

Last modified: 22/11/2018

Comments are closed.

error: Vote for Congress!