Mizoram Pradesh Congress Committee (MPCC)

MIZORAM IN HMASAWN CHAK LAWMMAN LA

29/11/2018

PRESS STATEMENT

India Today-in State hrang hrang hmasawn dan a tehnaah
Mizoram a che tha
(Economy leh Entrepreneurship-a hmasawn chak ber Mizoram)

India Today-in India rama state hrang hrangte hmasawn dan tehna, kum tina a tihchhuah thin chu November 22, 2018 khan a tichhuak leh ta a. India rama state te deuh, small state an tih zingah Congress Party kaihhruai Mizoram sorkar chu Environment leh Inclusive development category-ah TI THA BER (Best Performing State) a puan a ni a, Economy leh Entrepreneurship category-ah te HMASAWN CHAK BER (most improved state)-ah puan a ni bawk. Tin, tehna dang – Hmasawnna ruhrel (infrastructure) siam kawngah te, Hriselna (health) lamahte, Dan kenkawhna (law and order) lamah pawh Mizoram hian hma a sawn nasa hle a, a rank a sang sawt hle a ni.

India Today-in state hrang hrangte dinhmun a zirchianna hi November 22, 2018-a New Delhi-a State of the States Conclave, 2018 an buatsaihah puangin state engemawzat hnenah lawmman an hlan nghal a. He conclave hi India ram Vice President Venkaiah Naidu bakah state hrang hrang 4 – Gujarat, Assam, Tamil Nadu leh Poducherry CM-ten an telpui bawk a, ngaihhlut a hlawh hle a ni.

India Today hian kum 2003 atang khan India rama state hrang hrangte dinhmun tehna hi felfai takin a lo siam tawh a. Kum 2004 atang khan India rama state hrang hrangte chu category hnih- Big States leh Small States-ah a thliar a, state lian, 35,000 sq km a zau leh mipui maktaduai 5 aia tam awmnate chu big state category a dah an ni a, a hnuai lamte chu small state category a dah an ni thung. State hrang hrangte chu tehna hrang hrang 13- overall, economy, infrastructure, agriculture, education, health, law and order, governance, inclusive development, entrepreneurship, environment, cleanliness leh tourism lama an hmasawn dan atangin uluk taka teh an ni. State hrang hrangte dinhmun tehna atan hian data kimchang taka lakkhawm a ni a, mithiam rual engemawzat rawn an ni bawk.

Kum 2018-a India ram state hrang hrangte dinhmun tehna hi India Today kaihhruainain India rama research agency lar tak pakhat, Marketing and Development Research Associates (MDRA)-ten an buaipui a. An dinhmun leh hmasawn chak dan a zirin state hrang hrangte chu ‘ti tha ber’ leh ‘hmasawn chak ber’ ah te a thliar hrang leh a ni. An awmna category-a tehna hrang hranga che tha berte chu Best performing state (dinhmun tha ber) a puan an ni a, kum 5 chhunga an hmasawn chak dan tehna atanga ti thate chu Most improved state (hmasawn chak ber) a puan an ni bawk.

Small state category-a state hrang hrang dinhmun chu hetiang hi a ni:
Category Best Performing State Most improved state
Overall Puducherry Tripura
Economy Goa Mizoram
Infrastructure Delhi Tripura
Agriculture Puducherry Meghalaya
Education Sikkim Arunachal Pradesh
Health Puducherry Delhi
Law & Order Nagaland Arunachal Pradesh
Governance Goa Sikkim
Inclusive Development Mizoram Tripura
Entrepreneurship Delhi Mizoram
Environment Mizoram Goa
Cleanliness Sikkim Puducherry
Tourism Goa Goa

PRESS STATEMENT

Aizawl West I bialchhunga Pu K Sangthuama’n MLA Fund a hmanna hrang hrang RTI Act hmangin 17th October 2018 khan lakchhuah a ni a. A bial chhunga MLA fund a hmanna hrang hrangte kan thlirin a lungchhiat thlak a, Aizawl West I bial mipuite hmuhsitna mai piah lamah MLA Fund hmanga mahni leh Party enkawl a tum hi a mak kan ti a, he bial tan hian MLA ni tlakah kan ngailo a ni.

Pu K Sangthuama’n a MLA Fund a hman hrang hrang zinga a dik lo langsar zual bikte chauh han tarlang ila :-

1. Kum 2018-19 chhunga a MLA Fund hmanah Sairang GSA chu Field Thar laih hna a pe a, he hna a pek dawn hian Sairang GSA te bulah Rs. 5,00,000/- (5 lakhs) man hna kan pe ang che u a, Rs. 1,00,000/- hi kan pawt let anga, Rs. 4,00,000/- in hna inthawk dawn nia tiin an inrem a, hna chu an inpe ta a. Mahse RTI a kan lakchhuaha a lan danah chuan Rs.20,00,000/- (20 lakhs) hmanral angin a inziak si a, Sairang GSA chuan Rs. 4,00,000/- (4 lakhs) chauh an dawng si a ni. Tichuan Rs.16,00,000/- (16 lakhs) chu a bo a, a hmanralna kan hre ta lo a ni. Sairang GSA te hi dt. 21.7.2018 zing dar 8:57 ah Pu Liandinga, Aizawl West-I MNF Block Treasurer In ah amah ngei Pu Liandinga hian Rs. 400,000/- (Nuaih li) hi GSA Sairang hruaitute a hlan a ni. (RTI 2018-19 Serial No. 7)

2. 2013-2019 chhunga MLA Fund hmannaah hian Tanhril MUP hminga hnachhuak zawng zawng chu Rs. 2,55,000/- man a ni a. Heng hna hrang hrang zingah, MUP Tanhril te hnathawh chu Rs. 25,000/- (singhnih sangnga) man chauh a ni a, an hriatpui hauhloh belhkhawm chu Rs. 2,30,000/- (nuaihnih singthum) man a ni a. Heng pawisa kawngbo te hi khawia hman nge a nih an hriatpui lo a ni. (RTI 2017-18 Serial No. 43,44,45. 2018-19 Serial No. 19)

3. Pu K.Sangthuama hian a MLA chhung hian a Fund atangin Tuivamit Tennis Club hmingin hna hrang hrang Rs.11,00,000/- (11 lakhs) hmangral angin RTI ah a inziak a; heng pawisate hi Seal lem siamchawp hmanga lakchhuah thin a ni a, heng pawisa tehi NREGS hmanga Tuivamit mipuiin kawng an laih vek tawhsa chu thawk angin an tarlang a.

Tin, Tennis Club hming hmang hian AICS Transformer bula Retaining wall siam hi lungremsa vek tawh thawk angin an insawi a, AICS Jr School bula PCC Flooring hnathawh anga an tarlan pawh hi MLA Fund nilovin School pawisa hmanga hnathawh tawh zawk a ni.
(RTI 2016-17 Serial No. 23,50,51. 2017-2018 Serial No. 149. 2018-19 Serial No. 43, 44)
4. Luangmual vengah hian hna hrang hrang Rs. 3,00,000/- (3 lakhs) man thawh anga sawi hi a hna hmuh zawhloh a ni. Heng hna hrang hrangte hi khawi hmunah nge a thawh a, a thawhna hmun min kawhhmuh turin Pu K.Sangthuama hi kan phut tlat bawk a ni. (RTI 2016-17 Serial No. 53. 2017-18 Serial No. 106, . 2018-19 Serial No. 47)

5. Sakawrtuichhun a MLA Fund hmanna atana Rs.20,000/- man UPC (Mz) bula Side drain hnathawh hi Kohhran hnatlang a thawh a ni a. Agency atana hman Sakawrtuichhun Local Council hian Cement Bag 2 chiah Kohhran hnatlangah an pe a ni. RCC Flooring Dam Veng Road a hnathawh, Sakawrtuichhun Local Council ten MLA Fund Rs. 1,00,000/-hmanga thawk anga an insawi hi AMC atanga thawh a ni. Tin, PCC Flooring H/S Road hi Farmer’s Club Sakawrtuichhun ten Rs.40,000/- thawh anga sawi a ni a, he hna hi hmuh tur a awmlo. (RTI 2016-17 Serial No. 53. 2017-18 Serial No. 106, . 2018-19 Serial No. 47)

6. Sairang Dinthar-ah hian MLA Fund hmanga a hnathawh thenkhat zingah Rs. 4,59,600 man hi hnathawhnan leh Silpauline leinan hmang anga inziak a ni a, hei hi hriatpui a ni lo a. Tin, Sairang Dinthar GSA tana Rs. 1,00,000/- man hna a pekah hian GSA chuan Rs. 40,000/- chauh a pawisa an dawng a ni. (RTI 2013-14 Serial No 28. 2015-16 Serial No 39. 2017-18 Serial No. 142)

7. Phunchawng venga MLA Fund hmanga hnapek Rs. 30,000/- man hi Mirethei Inhlawh Pawl hnena pek anga tanlan a ni a. Phunchawng veng hi mi harsa te te awmkhawmna veng nimahse Mirethei Inhlawh Pawl hi he vengah hian a awm lo a, a awm ngai pawh an ringlo a ni. Self Help Group (Mari Group) Phunchawng hmingin Rs. 80,000/- man hna pek anga tarlan hi he pawl hian an hriatpui lo bawk a, an kutah hna leh pawisa hi a thleng lo bawk a ni.

Tin, Phunchawng MHIP tana Vantlang Zun-in repair Rs. 15,000/- man hi Phunchawng MHIP ten an hriatpuilo a, Vantlang Zun-in repair a awm tih pawh an hre lo. (RTI 2013-14 Serial No 20. 2015-16 Serial No 19. 2017-18 Serial No. 11)

Aizawl West I MLA Pu K Sangthuama hian a MLA Fund a hmannaah hian Pawl hming phuahchawp leh hnathawh hmuh tur awmlo a tam em em a. MLA Fund a pek atang hian a chanve (50%) te a pawisa faiin a la let fo thin bawk a. Hetiang MLA kan nei hi a zahthlakin a vanduaithlak kan ti hle a ni.

MLA Fund a hmanna atanga hnathawh hmuh tur awmlo leh a pawisa pawhlet tunhnaia kan hriattheih chin ringawt hi Rs. 39,74,600/- (Nuai sawmthum pakua, sing sarih, sangli leh zaruk) a ni a. Heta kan tarlan loh tam tak hi a awm ngei pawh kan ring a ni.

Pu K Sangthuama hi MLA Candidate zingah pawh sum leh pai nei a, hausa ber pawla kan ngaih a ni a. Heti tak maia MLA Fund a hmanna kawnga a ma mimal tana thahnem ngai taka pawisa (MLA Fund) a pawt then fo mai leh hminglem phuahchawp hmanga MLA Fund a hmang vak mai hi a mak kan ti a. Hetiang ang mi hi MLA atana thlantlin fo tlakah kan ngailo a ni.

PRESS STATEMENT

Ni 20.11.2018-a MNF Legal Board-in Mizoram sawrkarin Lokayukta dinna tur cheng nuai 478.02 zet a buatsaih tawh, Law & Judicial Minister-in a fanghma no ei mai em ni tia an zawhna chhanna chu hetiang hi a ni e:-

Congress Party hian Lokayukta din hi an Manifesto zing a mi a nih angin, The Mizoram Lokayukta Act, 2014 hi kum 2014 khan House-in a passed a, he Institution hi neih tumin kum 2016-17-ah Budget-ah Rs. 159.34 lakhs pawh dah a ni a, hman lovin kum tawpah ‘surrender’ a ni a. Kum 2017-18-ah pawh hman theih ngei beiseiin Budget-ah Rs. 159.34 lakhs bawk dah leh a ni a, hman loh bawkin kum tawpah ‘surrender’ lehin kumin 2018-19 hian cheng nuai 159.34 bawk dah thar leh a ni a. High Court lam te nen pawh he Lokayukta Office luahtu hi peih hman ngei a nih beiseiin Chairman leh a thawktu dangte Office tur pawh Bungkawn Tuikhur Veng a Pi Judy Zohmingliani In chu luahin Furniture leh a tul dang atan kumin 2018-19 hian engemaw zat chu sum sen a ni ta a. Kumin financial year chhung hian chuan Lokayukta Chairman leh a thawhpui hi Selection Committee (Chief Minister, Guwahati High Court Chief Justice emaw a aiawh emaw, Legislative Assembly Speaker leh House-a Opposition Group Leader) in an thlan fel chuan sum hi engemaw zat chu hman ngei a ni dawn a ni. Sum bo cheng khat pawh awm lova, hman loh kha ‘surrender’ a, a kum lehah Budget-ah dah leh mai thin zawk a ni e.

Law & Judicial Department-a mi pakhatin cheng nuai 143 lai amah leh a chhungte Account-a a lo dah tih pawh hi hriat chhuah a nih veleh he pawisa chingpen chungchanga a mawhphurtu ber ni a hriat, Bill Assistant chu ban nghal a ni a. Law & Judicial Department hian Finance Department chu Special Audit nei tura a tih angin Special Audit neih a nih hnuah Anti Corruption Bureau (ACB)-ah FIR thehluh nghal a ni a. Investigation kal mek a ni a, rei vak lovah chinfel thuai beisei a ni. Law Minister hi he sum chingpen chungchang hrilh hriat a nih ve leh hetiang hian hma a la nghal vat a ni. Inthlan a hnaia, mi thenkhatte lo awih tawk, thu mak pui puia inpuhna a awm hi MPCC chuan pawi a ti hle a, mipui ti chi-ai leh behchhan mumal awm lova hetia tute emaw dik lo taka inpuh hi chin loh ni se a duh hle bawk a ni.

__________________________________________________________________
Issued by Mizoram Pradesh Congress Committee Media Department Dt. 23.11.2018

Last modified: 29/11/2018

Comments are closed.

error: Vote for Congress!