Mizoram Pradesh Congress Committee (MPCC)

TRANSPORT MINISTER-IN AIZAWL DISTRICT TRANSPORT OFFICE THAR A HAWNG

29/08/2017

DIPR,29.08.2017: Aizawl District chhunga Aizawl Municipal Council (AMC) in a huam loh zawng tuam tur Aizawl District Transport Office (Rural) chu vawiin khan Chaltlang-ah Transport Minister Pu John Rotluangliana chuan a hawng. Hemi rual hian district tin DTO-a hman tur vehicle registration software Vahan 4.0 chu tlangzarh nghal a ni.

Transport Minister Pu John Rotluangliana chuan Aizawl DTO Rural hawn thar a ni chu department hmasawnna pakhat a nih thu leh, Aizawl DTO indaihlohna pawh a ziaawm phah sawt a, a dawrtu mipui tan pawh awlsamna a thlen a beisei thu a sawi a. Transport Department chu department pawimawh tak, sorkar sum bel ah pawh chhunglut hnem ber zing a mi a ni a ti a; thawktute thawhrimna chungah lawmthu sawi pahin Transport Minister chuan mipui rawngbawltu an nihna hre reng chunga taima leh rinawm taka thawk zel turin fuihna thu a sawi a ni. Mizoram hi kan kalphungah inhriatthiamna nen kan kal nasa hle thin a, dan anga kal kan ngaihpawimawh tel a tul a ni, tiin Transport Minister chuan ram neitu thinlung put tlan a pawimawh thu a sawi a. DTO (Rural) hawn thar pawh chu thawktute hnenah tha taka bul tan a, mipui tan dawr nuam tak an nih a beisei thu a sawi bawk.

Aizawl DTO (Rural) siam hnu hian Aizawl khawpui chhung zawng (AMC area) chu Aizawl DTO (Urban) in a tuam a, a bak zawng chu DTO (Rural) hian tuam in, he office hnuaia lirthei register te chu “MZ09” code pek an ni ang.

Vawiin a tlangzarh, Vahan 4.0 hi sorkar laipuia Ministry of Road Transport and Highways-in India ram puma hman tura a duan niin, kum 2003 khan software pahnih – Vahan leh Sarathi hi Aizawl DTO-ah NIC kaltlanga hman tan a ni a. Version thar zawk Vahan 4.0 leh Sarathi 4.0 te hi hmang vek turin tunah inpuahchana a kal mek a; Vahan 4.0 hi tunah hian State 21 in an hmang tawh a, Sarathi 4.0 hi State 20 in an hmang tawh bawk a, Easter Zone-ah chuan Nagaland, Arunachal Pradesh leh Mizoram-ah chauh tun dinhmunah hman a ni. He software hmang tur hian DTO leh staff zawng zawng training pek a ni tawh bawk.

Heng software pahnih hi awlsam zawk leh langtlang zawka mipuiin tunlai technology hmang tangkaia department an dawr theihna a ni a. E-payment, Dealer Point services, online services, Fancy Number Bidding-te bakah Fitness Test-te khawi district atang pawhin a tih theih tawh dawn a. District pakhat a commercial vehicle register turin district dangah lirthei lei ta se, a leina district-ah a duh chuan fitness test a ti nghal thei tawh dawn a ni. Heng bakah hian chhiah chi hrang hrangte hi mahni lirthei register-na district-ah kher pek a ngai tawh dawnlo a, Insurance company-te nen he application hi a inthlunzawm vek dawn avangin data hi a rintlak dawn a ni. Online Service-ah chuan Road Tax online a pek te, Transfer of Ownership-te, Change of Address, etc. te a theih tawh dawn a ni. India ram puma Vehicle Registration leh Driving Licence data hi National Register-ah dah luh vek a ni a, tunah hian lirthei vaibelchhia 21 leh Driving Licence vaibelchhia 11 record a awm tawh a ni.

Vawiin Aizawl DTO (Rural) hawnna inkhawm hi Pu Lalthangpuia Sailo, IAS. Secretary, Transport Department chuan a kaihruai a, Pi Lalmuanawmi, Coordinator, Transport Department, NIC leh Pu R. Lalbiakdika, APM (IT) te hnen tangin thusawi ngaihthlak a ni bawk. Hun hi Pu R. Remmawia, Transport Director in lawmthu sawiin a khar a ni.

Last modified: 29/08/2017

Comments are closed.

error: Vote for Congress!