Mizoram Pradesh Congress Committee (MPCC)

MIZORAM STATE TRANSPORT AUTHORITY THUKHAWM

27/07/2016

26TH JULY 2016 : Vawiin khan Mizoram State Transport Authority chu an Chairman Dr. Franklin Laltinkhuma, IAS Office Chamber ah an thukhawm a, Mizoram Public Transport chungchangah thil chi hrang hrang an rel.

Meeting-ah hian mipui vantlangin an tangkaipui zawk beiseiin Aizawl khawpui chhungah 2-wheeler taxi service turin permit pek nise tiin an rel a. Hemi atan hian 2-wheeler (Scooter/Motorcycle) register tawh pawh kum 2 aia upa lo chu taxi atan phal ani ang a, Engine lenzawng 125 cc aia tlem lo a ni tur a ni. Taxi khalhtu chuan helmet (Headgear) rawng eng (yellow) a hma lama ‘TAXI’ tih rawng sen a ziak a khum tur a ni. 2-wheeler taxi hi Public Service Vehicle a nih dawn avangin Registration No. Plate pawh a eng tur a ni.

Aizawl khawpui chhung lut lovin khawpui daifem (Aizawl suburb) ah Autorickshaw tlan tir tum a ni a. An service dan tur chu Aizawl Chhim lamah ACBOA office bul, Ngaizel thleng; Aizawl chhak lamah Thuampui; Aizawl Khawthlang lamah Luangmual, Chhangurkawn; Aizawl Hmarlamah Durtlang Leitan thleng an service thei anga, Aizawl khawpui laili lamah an lut thei lovang.

Accident laka mipui te an him zawk theih nan Public Service Vehicle Replacement chungchang uluk takin STA hian an ngaihtuah a – Autorickshaw, 2 Wheeler Taxi, Maxicab, Bus, etc. kum 10 aia upa chu public service atan hman tawh loh nise an ti a. Heng Public Service Vehicle kum 10 chung lam neitute hnenah hian an motor a thar a thlak (replace) phalsak an ni ang a. Light Public Vehicle (LPV) hnuailam chu thla 6 chhung motor replace-na hun pek an ni ang a, Medium Public Vehicle (MPV) leh Heavy Public Vehicle (HPV) te chu thla 8 chhung hun pek an ni ang. Hun pek chhunga motor thara replace lo chu an Permit Cancel tur a ni ang. Replace a nih hnu hian kum 5 atan permit pek a ni ang a. Kum 5 a ral hnu ah Fitness Test motor in a paltlang chuan, kum 5 dang pawhsei sak leh theih an ni ang. Hemi hnu hi chuan an permit hi a tawp (expire) ang. Replacement hi vawi 1 (khat) chiah phalsak tur a ni.

Tun dinhmunah chuan Local Taxi te hi All Mizoram Permit an lak phalsak leh rih nise tih a ni a. Mizoramin Tourist Taxi a mamawh tawk a neih hnu ah All Mizoram Permit chungchang hi ngaihtuah nawn nise tiin STA chuan a rel a ni.

Last modified: 27/07/2016

Comments are closed.

error: Vote for Congress!