Mizoram Pradesh Congress Committee (MPCC)

Congress sawrkarah mi 1,223 Corruption vangin hrem tawh – R. Lalzirliana

08/06/2016

Aizawl, 7th June, 2016: Home Minister Pu R. Lalzirliana chuan Chief Minister Pu Lal Thanhawla tawngkam ‘Corruption a zung nen lam kan pawt phawi ang’ sawi chhawngin Mizoram sawrkar chuan corruption tam tak a zung nen a pawtphawi tawh a ni a ti.

Nimin khan Aizawl Press Club-a press conference-ah Pu Zira chuan mi thenkhatten corruption Bureau chhuitir lova departmental enquiry chu engmah lo ang hialin ngai mah se, engmah a lo nihzia chu kum 2008 atanga June ni 3, 2016 thleng khan Departmental enquiry case, Vigilance Departmental Record ang chuan 1,606 awmah 1,441 chinfel tawh a ni a, la chinfel loh 165 a awm; chung zingq 218 chuan thiam an chang a, mi 1,223 chu hremna pek an ni a ti.

Vigilance Minister chuan hremna pek mi 1,223 zingah mi 97 chu zilhhau (censure) an ni a, mi 3 chu an promotion hrensak an ni a, mi 27 chu an eiruk rulhtir (recovery of loss) a ni a ti. Mi 662 chu an hlawhpung (increment) hrensak an ni a, mi 23 chu an nihna hnuaiah tlakthlaktir an ni a ti.

Mi 57 chu chawlhluihtir (compulsory retirement) an ni a, mi 158 chu an hna atanga thlawntir (remove) an ni a, mi 15 chu an hna atanga bantir (dismiss) an ni a ti.

Pu R. Lalzirliana chuan corruption leh a kaihhnawih thubuai 239 awmah 211 chinfel tawh a ni a, 28 la chinfel loh a awm a ti a. Thiamchang/ngaihdam 57 an awm a, hremna pek 154 an awm a ti.

Home Minister chuan hremte zingah 29 chu zilhhau an ni a, mi 3 chu an kaisanna tur hrensak an ni a ti a. Hloh rulhtir 25 an awm a, hlawhpung hrensak 21, an hlawh tihtlemsak mi 54, an nihna atanga bantir 5 leh an hna atanga maiparthlawntir 5 an awm a ni a ti.

Pu R. Lalzirliana chuan kum 2008 atanga June ni 3, 2016 thlengin Anti Corruption Bureau (ACB) chhui mi 160 an awm a, chung zinga 59 chu thubuai siamsak an ni a, chargesheet tawh mi 48 an awm a, court in thubuai a chinfel tawh 12 an awm a ni a ti.

Pu Zira chuan corruption chu Eden huan aranga awm a nih thu sawiin, tihbo vek chu a harsa thei a ni a ti a, mahse, sawrkar chuan corruption a zung nena pawtphawi turin theihtawp a chhuah a ni a ti. Mizoram sawrkar Pu La Thanhawla hruai chuan thil dik lo chhui ngam loh emaw dik lova hmuhte hrem ngam loh emaw a nei lo a ti.

Last modified: 10/08/2017

Comments are closed.

error: Vote for Congress!