Mizoram Pradesh Congress Committee (MPCC)

Tuirial Hydro-Electric Power Project 60MW

Mizoram hmasawnna tura ‘Ram ro tling’ Pu Lal Thanhawla hova bul tan, Congress party a sorkar loh kum 10 chhunga rawih chhe hman hial, 2008 a sorkarna a chan atanga chhunzawm leh chauh Tuirial Hydro Electric 60 MW Power Project, 251,000,000 units Kawlphetha chakna siamchhuak thei chu India Prime Minister Pu Narendra Modi chuan ni 16, December 2017 khan Aizawl-ah a rawn hawng ta rup mai a. PM hialin hawn a chak hmasawnna ruhrel lian zoram mipuiten kan mamawh em em ni bawk hlawhtlinna kan lo hmu ta hi a lawmawm tak zet a. Tuirial HEP 60 MW atang hian Mizoram chuan 12% (7.2MW) a thlawnin a dawng mek a ni.

A tobul :
Congress sawrkar hmasa in Tuirial Hydel Project 60 MW siam a dilna chu central sawrkar chuan pawmin contractor ah NEEPCO a thlang a, he project hi khatih laia Mizoram Chief Minister Pu Lal Thanhawla hmalakna in Japan atanga tanpuina pawisa hmanga sak tur a ni a, May 1996 a Mizoram sawrkar leh NEEPCO in agreement an ziah ang chuan February, 2006 ah a vaia zawh tur a ni. He project a ram mamawh tur chin 5,380 hectare chu Ministry of Environment and Forest (MoEF) chuan July 1997 ah a phal sak a, heta ram hectare 5,380 atang hian project area atan hectare 169.5 niin tuiin a chim tur chin (submergence area) chu hectare 5210.5 a ni.
Japan sorkar hnuaia Overseas Economics Cooperation Fund (OECF) ten project estimated amount Rs. 368.72 crore rawn tum theiin MoU pawh ni 26.9.1996 khan signed fel a ni a. He project hna (contract) hi kum riat chhunga thawk zo turin NEEPCO-te thlan nghal an ni a, 2004 ah zawh fel tura tih a ni. Hna bul tanna lungphum pawh ni 12.9.1998 khan CM Pu Lal Thanhawla leh Central Minister Shri Purkayastha ten an phum dun ta a ni. MNF sorkar laiin compensation uchuak taka ngiattute vangin kum 7 chhung zet hna chawlhsan a nih hnuah kum 2012 a hna thawh chhunzawm a nih dawn hian estimate hi ennawn a siam that a ni a, cheng vbch 1302 a thawh zawh a ni.

Compensation uchuak ngiattute vangin project a khawtlai:

Tuikhuahin a chim chhiat tur Tuirial dunga huan leh ram nei dik takten zangnadawmna an hmuh theih nan objection & compensation atana in-report turin 1997 khan sorkar Notification – No K.12011/1/96-Rev.Dt.3.3.1997 chhuah a ni a. Dilna tam tak te enfel a nih hnuah ram nei dik tak leh pek tlaka ngaih mi 48 te chauh chu pawmsak an ni ta a.

Kum 1998 December thlaah MNF sorkar a lo piang a. Sorkar hmasa chinfel sa mi 48 te kha compensation a chinfelsak duh ta mai lo va. A tharin Notification No. 12011/3/96-Rev. Dated 20.8.2001 chu a chhuah leh ta a. Hetah hian MNF srokara Chief Minister Pu Zoramthanga, Power & Electricity Dept changtu vua leh vang, Minister leh MNF party hotu te, Aizawl leh Champhai atangtein a taka ram awm lo V/C Pass, Revenue Pass tharte siamin leh Huan Pass lemte leiin an dil ta sup sup a.

Chung dilnate chu MNF sorkar khan compensation pek turin mi (hming) 1,021 te chu a pawmsak ta a ni. Heng mi sang chuang zette hi MNF sorkar chuan NEEPCO te hnenah compensation pe turin a ti a. Uluk taka record te zirchian a nih hnuin NEEPCO chuan cheng nuai 437 chu DC (Collector) hnena compensation atana sem tura a deposit hnu-ah a balance cheng nuai 2065 chu a deposit duh ta lova, he a deposit duh tak lohna chhan NEEPCO in a sawifiahna ah chuan a bak hi chu forest area anih avangin, Environment & Forest Department, Govt of Mizoram hnenah cheng vaibelchhe 24.46 afforestation na tur atan a lo chawi tawh avang a ni tiin a sawi a ni. Forest Department hnena compensation an pek tawhna ram chhungah, midang mimal hnena pek nawn leh kha NEEPCO in an duh ta lo a ni. (Forest Reserve Area hi central ta a nih avangin mimal in ram an nei thei lova, state sawrkarin mimal hnenah ram a pe thei lo).

Tichuan, Mizoram electric power siamchhuah tihpun kawnga project pawimawh tak chu diklo taka Forest Reserve Area chhunga mimal thil ti thei ten ram an lo neih tak thuta Compensation ngiattu an tam tak thut avangin Tuirial HEP 60 MW sak hna chu chawlhsan a lo ni ta a ni

Project thar thawh leh a niin Tuirial HEP 60 MW chu zawhfel a ni ta

Vanduaithla takin Congress-in Sawrkarna a chan loh chhung 1998-2008 khan Tuirial HEP hi a thuanawp hman hle a. Pu Lal Thanhawla hova Congress-in sawrkarna a chan nawn leh 2008 kum tawp atangin he project Tuirial HEP hi chhunzawm leh a nih theih nan sorkarin theihtawpin hma a la a, January ni 14, 2011 khan Central Sorkar chuan remtihpuina (approval) chu a chhuah leh ta a. Hna pawh thawh chhunzawm leh nghal a niin vawiin-ah chuan Tuirial HEP 60 MW kawlphetha pe chhuak thei chu peihfel a PM hawn tir a ni ta a. Kan ram chhunga kei mahni thar chhuah ngei Hydel Project atangin electric kan chhi eng ta kung mai, a va lawmawm em! Pathian hnenah lawmthu I sawi mawlh mawlh ang u.

Highlights

Kum 2007-08, 2008-09 khan MNF sawrkarin mipui hnenah power 169.39, 165.38 Million Unit a sem theih laiin Congress sawrkar erawh chuan kum 2014-2015, 2015-16 ah chuan 327.21, 338.35 Million Unit zet mai mipui hnenah a sem a. Hetih lai hian Mizoram economy a thang nasa em em a MNF sawkar lai 10th Plan(2002-2007) chhung khan Mizoram Economy GDP chu 5.1%*(Planning Commission of India) in a than laiin Congress sawrkar lai 11th Plan (2007-2012) ah chuan Mizoram GDP chu 8.85% in a thang (hei hi Agriculture Sector 10th Plan a 0.15% a thang thin kha 11th Plan ah 6.7% in NLUP vanga a than chhoh vang a ni).

Mizoram Per Capita Income (Mi tinin kum khata sum kan lak luh chawh rual) pawh MNF sorkar tawp 2008-2009 ah Rs. 38,582 atangin tunah chuan Rs. 95,317 (2015-2016) ah a kai chho ta dawrh a. A vawi khat nan National level Rs 93231 aiin per capita income kan sang zawk a ni. Kan khawsak te pawh a lo awlsam tan a, electric kan mamawhna tur thil bungrua leh khawl pawh kan lo nei hnem ta, Congress sawrkar hian mipui hnenah power min pe tam tulh tulh mahse kan indaih thei ta tak tak lo. Hei hi kan sawrkar hian hre rengin ram changkan leh than chhoh ang zel a power kan neih belh theihna turin Pu Lal Thanhawla ho hian congress party chuan Power tam zawk thar turin ruahmanna a siam chho mek a, Congress a sorkar zel hi kan ram electric a kan intodelh nan a tul takzet a ni.

Tuirial Compensation ah hian ….

  1. June, 1999 khan Compensation diltu awm zat chu mi 33 an ni a, July 2002 ah mi 352 in an pung, July 2003 ah 74, September 2003 ah 366, September 2003 ah vek 196 ti chuan an vaiin mi 1021 an ni ta a ni. A tirah mimal hnena compensation pek tur zat hi cheng nuai 34.06 lek a nih laiin MNF sorkarin a tihpun fe hnuah cheng nuai 2502.02 ah a han pung chho ta dawrh a ni.
  2. Pu Zoramthanga U leh nauten Compensation ngiat nana an pawl din chawp Tuirial Crop Compensation Claimnants Assn (TCCA) ten ni 9. 6. 2004 – 13. 8. 2004, ni 64 chhung tehmeuh band phuahchawp siama NEEPCO thawktute an dahchah tlat avangin Tuirial HEP cheng vaibelchhe 368.72 senga siam zawh theih chu vaibelchhe 1302 sen a ni ta a ni.
  3. Tunah hian diklo taka Tuirial HEP 60 MW sakna Compensation ngiat chungchangah hian CBI meuhin chhuiin mi 9 (pakua) an chargesheeet a, Guwahati High Court-ah an thubuai ngaihtuah mek a ni.

Comments are closed.

error: Vote for Congress!