Mizoram Pradesh Congress Committee (MPCC)

Congress chhulchhuak Medical College – MIMER

Kum 20 chhung zet rambuai kan nih avangin Mizoram chu hmasawnna kawngah kan hnufual em em a. Silai puak reng karah ram a thang thei lo va, Pu Lal Thanhawla hovin Congress Party chuan Remna leh muanna zuarin a Lal thutthleng a kian a. Remna kan neih hnuah pawh kan thenawm state-te umpha tur leh ram rotling an neih ang nei ve turin theihtawp chhuah a ngai a. Development thawh tur a la tam em em a ni.

Remna leh Muanna kan neih atanga kum sawm na chiah ah, kum 1996-a Prime Minister H.D Deve Gowda-a’n Mizoram a rawn tlawh tum khan Pu Lal Thanhawla kaihhruai Congress sawrkar chuan damdawiin lian leh Medical College Mizoram-in kan mamawh thu an lo thlen a. PM Deve Gowda chuan Chief Minister ngenna chu ngai pawimawhin khum 300 awmna, nakin hnuah khum 500 thenga tihlen theih tur State Referral Hospital sakna atan Planning Commission kaltlang-in cheng vaibelchhe 40.53 a rawn pe ta a. Khatihlai congress sorkar khan Medical college-te mitthla-ah hmu in, upgrade zel turin ngaihtuahna a lo seng daih tawh a ni.

Kum 1998-ah MNF sawrkar a lo dingin anni hian hospital main building tur sa mumal lovin administrative building leh staff quarters lam an buaipui hmasa a, pawisa vaibelchhe tam tak hi an suasam a ni ber. An contractor-ten hna an thawh chhiat em avangin Central lam an lungawi ta lo va, sum la pek hmabak instalment te chu pek chhunzawm zel tlakah an rawn ngai ta lo hial a ni.

Kum 2004 khan State Referral Hospital tur atana ruahman meuh-ah chuan phuahchawp takin Doctor 2, Staff Nurse 4 leh Group D staff 3 te nen a hmingin bul an tan ve naw naw a. A kum lehah tlema hmasawn ve hret leh Central lam endik tute mitmei ven nan niawm takin Dt 21st July, 2005 khan khum 50 awm theihna turin tuna MIMER Administrative Building-ah hian official takin Hospital chu an hawng ve a ni.

Building hrang hrangte hi a sak dan phung leh sum hmanna a dik tawk loh em avangin Dt. 18.08.2005 khan Development of North Eastern Region (DoNER) Ministry-a Deputy Secretary D.K. Singh chuan a hmunah a rawn endik ta hial a. MNF sorkar sum hman danah Central a lawm tak loh em avangin vaibelchhe 5.5 lai mai chu pek chhunzawm tlakah ngai lovin an rawn release duh ta lo a ni.

REFERRAL HOSPITAL TAN KAWL A ENG TAN TA

Kum 2008 a Congress sorkar a lo din nawnleh khan Chief Minister zahawm tak Pu Lal Thanhawla tha hnemngaihna leh khatih laia Health Minister zahawm tak Pu Lalrinliana Sailo-in hma a lakna zarah State Referral Hospital, Falkawn chu tuaihnum a lo ni leh tan ta a. Ni 10, December 2012 khan congress sorkar chuan khum 150 awm theihna turin a hlangkai a leh ta phawt a, hmasawnna kawng a zawh chho leh ta.

February ni 19, 2014 khan Joint Secretary, Ministry Of Health & Family Welfare hnen atangin State Referral Hospital, Falkawn a ‘Medical College’ din phalna hmuh a lo ni ta a. Mizoram sorkar pawh chak lehzuala inbuatsaihin Ni 24, March 2014 khan Dr. Jane R. Ralte chu Deputy Medical Superintendent atan dah a ni a. Ni 16, May 2014 khan Government of India Mizoram sorkar te chuan MoU an ziak fel a, Rs. 189 Crore ruahmanna tihfel a ni.

Ni 9, June 2014 khan kan Health Minister zahawm tak Pu Lal Thanzara kaihhruaina hnuaiah ‘Medical College Committee hmasa ber’ neih a ni a. Mizoram Medical College hming atan ‘Mizoram Institute of Medical Education & Research’ (MiMER) tih pawm a ni.

Medical College neih ngei tumin Health Minister Pu Lal Thanzara chuan theihtawpin hma a la zel a. January ni 7, 2015 khan Mizoram University atangin Provisional Consent of Affiliation hmuh a ni a. June, 2015 atangin Hospital building leh Quarters te hi sorkarin a thuam tha chho a. Ni 6, October 2015 atang khan KMV Projects Ltd., Hyderabad te chuan Hospital building cheithat hna hi an thawk nghal ta char char a ni.

Medical College nei thuai tura inbuatsaihna atan hian 1st instalment, Rs. 20 Crores chu Ministry of Health & Family Welfare chuan 29th January, 2016 khan Government of Mizoram hnenah a pe a. Ni 9, February, 2016 khan Dr. Lalhmuchhuaka, Medical Superintendent-in dah a ni bawk a. Ni 12 Febuary 2016-ah khum 150 awmna nimek chu khum 300 awm theihna turin tihlen a ni. Doctor Specialist tha tak tak dah belh zel a ni bawk. Department hrang hrang 14 awmin, Emergency hi darkar 24 chhung kal pui a ni a. Laboratory-ah thisen/ zun/ ek test pawimawh zual tih theih niin, OPD-ah ni tin damlo 150 vel an en a, damlo admit hi 100 chuang an awm reng bawk. Damlo zai (operation) chi hrang hrang tihtan a ni ta bawk a. Medical College a hnai sawt ta hle mai.

MIMER Director turin October 27, 2017-ah Dr Lallukhum Fimate appointment pek a ni a. Medical College ni tura tul angte peihfel a nih hnuin Medical College din tura phalna petu MCI Inspection Team te chuan endik tlak nia ngaiin November 21-22, 2017 khan MIMER hi an endik tan. Mizoram sorkar atangin December 21, 2017-ah post thar 409 siam leh hnawhkhah phalna hmuh a ni ta bawk.

MEDICAL COLLEGE PUITLING ‘MIMER’ KAN NEI TA

May 3, 2018 a lo herchhuah meuh chuan Medical Council of India chuan Mizoramah ‘Medical College’ (MIMER) din a remti ta. May 15, 2018-ah MCI-in Ministry of Health & Family Welfare-ah recommendation a thawn a, May 25, 2018 khan MIMER chu Ministry of Health and Family Welfare (MOHFW), Government of India, No.U.12012/37/2018-M E-1 [FTS No. 3154165 Dt. 25/5/18 hmangin 2018-2019 atanga MBBS mi 100 zir phalna, phalna, ‘Letter of Permission’ (LoP) a hmu a, Medical College kan nei ta a, MBBS Admission tan nghal a ni. Pathian hnenah lawmthu I sawi ang u.

MIMER CHU SOCIETY-AH REGISTRATION BUAIPUI MEK

MIMER hian chak zawka hmasawnna a neih theih nan, Mizoram sorkar hnuaiah Society Registration buaipui mek a ni. Hei hi a chhan chu, Medical College office file te chak taka a kal zungzung theihnan te, sorkar file kaldan pangngaia dawhkan 30 chuang paltlang ngaite a nih avangin, Society ah dah a nih chuan dawhkan 10 chuang awrh chauh a paltlang a ngai dawn a, Autonomous body ang deuhthaw, sorkar thuneihna hnuaiah thon ni siin MIMER hi kalpui a ni dawn a. Society anga kal a nih hian hnathawh a ti awlsam hle dawn a ni.

Tin, Central Medical College a nih loh avang hian, sum hmuhna tur zawn a ngai nasa dawn a. State sum chauhah innghat lo va, amahin a inhailuh ve dan kawng zawn a ngai a. Chumi atan chuan Society a in register hi tih ngei ngei tur a ni a. Foreign funding dil dawn leh Niti Aayog, NEC etc angah te sum dil dawn chuan Society of Registration neih a ngai tawh a. Kan thenawm state Medical College NEIGRIMS Shillong, Tripura Medical College, etc. te pawh hian an nei vek a ni. Chuvangin MIMER pawh hi Society ah registera ni ang.

Tunah hian khum 250 a awm mek a, khum 500 awm thuai tura ruahman mek a ni. August 7, 2018 khan ropui takin Chief Minister, Pu Lal Thanhawla’n hawngin, tunah hian MBBS 1st batch atan seat 100 awm chu hnawh khah nghal vek niin, doctor zirlai State quota 74, Central 11 leh NRI 14 awm mekin MBBS class an kal nghal char char a ni.

FACILITIES AVAILABLE

Blood Bank, Central Laboratory, Quarters for Staff, Hostel for Students, 20 bedded ICU, Radiology, Operation Theatres – 6 nos, Lecture Theatres – 2 nos, Library with 1500 books and 20 Journals.

Departments of Anatomy, Physiology, Biochemistry, Pathology, Microbiology, Pharmacology, Microbiology, Forensic Medicine, Community Medicine, General Medicine, Paediatrics, Dermatology, TB & Respiratory Diseases, Psychiatry, General Surgery, Obstetrics & Gynaecology, Orthopaedics, Oto-Rhino-Laryngology, Ophthalmology, Anaesthesiology, Dentistry, Radio-Diagnosis

HIGHLIGHTS

MNF sorkar khan tangkai takin Referral hospital falkawn hi a lo hmang ve tho va. 5th IR Police Bn dah nan te ( source -Zoram Today Magazine June ni 4-9, 2007), Mimal ten Ar vulh nan te, Private English Medium school a tan te an hmang ve a ni.

He hospital sakna tur atan hian kum 1999 ah hna bul tanna tur sum Central-in rawn pe tawh in, kum 2004 a sak zawh tura ruahman a ni. Mahse kum 2004 khan Rs. vaibelchhe 35.39 hmang tawh siin MNF sawrkar khan a pamtul ta a. An sum dawn tur bak la awm cheng vaibelchhe 5.5 pawh chu central sawrkar DONER Ministry khan a pe kim duh ta lo hial a ni.

Main building luah tur a awm miau loh avangin administrative building chu hospital atana hman a ni a, khum 50 vel awmin, doctor 2 leh nurse 8 in damlo 10 atanga 40 vel an enkawl thin.

“Kawng a bo hle a, State sorkarin a enkawl zawh chi lah a ni lova, tihngaihna tak pawh a awm lo a ni,”

– R. Tlanghmingthanga Health Minister ( source -Evening Post June 24, 2006 Inrinni ). He thu lo sawi tawhtu hian Medical College puitling a lo din tak hnu hian ‘MNF kuhmum a ni’ a ti nih chu!

Vawiin ah chuan Medical College MIMER ah..

Nitin, OPD ah mi 400 – 450 an inentir a, mi 150 -200 tea hmaa entir tawhna result hmuh leh ennawn ziah ang an ni a. Mi 200- 230 nitin damlo admit thar ziah ang a ni bawk. Tun ang renga hma a sawn chhoh chuan MIMER hi nakin lawkah Medical Council of India Norms angina khum 500 ah tih len thuai theih beisei a ni.

STATE REFERRAL HOSPITAL & MEDICAL COLLEGE ATANA FUND HMUH DAN

MNF sawrkar hunlai 1998 – 2008 – NIL;

Congress sawrkar hun 1998-ah Rs. 40 crores;

Kum 2008 – 2018 CSS – ₹189 crores; NEDP ₹63 crores

Total Rs. 292 crore
(Hetah hian salary leh maintenance cost a la tel lo a ni).

Comments are closed.

error: Vote for Congress!